15 raste të reja në Tiranë, Shkodër e Kamëz

MSH: Respektoni rregullat e distancimit

15 raste të reja me koronavirus janë identifikuar në 24 orët e fundit në Tiranë, Kamëz e Shkodër. Sipas epidemiologëve, mos respektimi i rregullave të vendosura po shton numrin e rasteve të infektuara.

“Përkatësisht, 10 raste në Tiranë, 3 raste në Shkodër dhe 2 në Kamëz. Dy rastet pozitive në Bashkinë Kamëz janë identifikuar gjatë një ceremonie mortore, ndaj edhe një herë Ministria e Shëndetësisë dhe Mbrojtjes Sociale u rikujton qytetarëve se funeralet përtej rretheve familjare të ngushta, nuk janë të lejuara, pasi janë rrezik për shpërndarjen e infeksionit”.

I pandryshueshëm vijon të jetë numri i pacientëve të shtruar në spitalin Covid.

“Po trajtohen 24 të prekur, nga të cilët 5 janë në terapi intensive, njëri prej tyre është i intubuar. Më pak se 10% e të prekurve aktivë po trajtohen në spital kurse pjesa tjetër po ndiqen nga mjekët e familjes”.

Në 24 orët e fundit nuk është identifikuar asnjë rast tek bluzat e bardha, ku për disa ditë me radhë ka patur të infektuar.

“Sa i përket rasteve të shfaqura në mënyrë sistematike në QSUT kanë lidhje të drejtpërdrejtë, me periudhën e inkubacionit 14 ditë dhe me kontaktin apo me kohën e kontaktit burim infeksioni në QSUT”.

Që prej fillimit të epidemisë, në vend janë infektuar 1212 persona,  910 prej të cilëve janë shëruar, ndërsa 269 persona janë  aktivë me Covid-19. 69 % e të prekurve janë në Tiranë kurse pjesa tjetër në Durrës, Shkodër, Kamëz, Krujë.

Leave a Reply