Është kohë e vështirë për Atikën, një natë e vështirë për Greqinë, por më shumë se 600 zjarrfikës dhe 300 automjete po punojnë në tre fronte, deklaroi sot kryeministri grek, Aleksis Cipras, pas takimit informues në Qendrën e Koordinimit të Brigadave Zjarrfikëse në Halandri.

Kryeministri i bëri thirrje të gjithë qytetarëve “të bashkojnë forcat për të bërë më të mirën”.

Cipras vuri në dukje se “të gjithë duhet të jemi vazhdimisht vigjilentë, të bashkuar dhe të bëjmë përpjekje për të përballuar një situatë shumë të vështirë për Atikën dhe të gjithë vendin”.

Ai falenderoi “të gjithë njerëzit të cilët kanë ndihmuar. Vullnetarët dhe veçanërisht zjarrfikësit kanë shpëtuar shumë jetë me vetësakrificën e tyre”.

Cipras ndërpreu një vizitë në Bosnjë-Hercegovinë ku do të merrte një çmim për kontributin për paqen në Ballkan.

Të paktën 60 persona humbën jetën pas zjarreve që shpërthyen në Atikën Lindore, ndërkohë që autoritetet i frikësohen faktit për më shumë viktima, pasi shumë persona kanë telefonuar shërbimin zjarrfikës për persona të humbur.

Ndërmjet viktimave ka shumë fëmijë.Të gjitha viktimat janë gjetur në zonën mes Rafinas dhe Nea Makri, sidomos në Mati dhe Kokkino Limanaki. Deri tani ka edhe mbi 170 të plagosur.