Ish-ambasadori i Shqipërisë në OKB: Pse rezoluta s’mund të quhet votë kundër SHBA-ve

Ish-ambasadori i Shqipërisë në OKB, Abdi Baleta flet për rezolutën e OKB kundër vendimit për Jerusalemin.

Në emisionin “Kjo javë” në “News24”, Baleta thotë se kjo rezolutë nuk mund të quhet votë kundër ShBA, pasi vetë rezoluta e OKB-së nuk është protestë ndaj SHBA-ve. Sipas tij, kjo rezolutë ishte një formë kërkesë ndaj SHBA për të rishikuar qëndrimet e saj.

Duke u ndalur në situatën e krijuar në Shqipëri pas kësaj vote, ish-ambasadori Baleta tha se “Debati për këtë rezolutë ka kaluar nga një çështje ndërkombëtare e shtetit shqiptar, në një përplasje të brendshme politike”.

Sakaq, ai ka komentuar reagimet e bëra nga Presidenti Meta dhe nga opozita, lidhur me votën e Shqipërisë në OKB.

“Në një shtet serioz, ku vërtet funksionojnë institucionet ku duhet, ku titullarët e institucioneve shohin interesin e shtetit, nuk merren vendime pa komunikuar me njëri-tjetrin. Por situata në vendin tonë nuk është normale. Imazhin e keq Shqipërisë nuk ka për t’ia krijuar ai votim atje, por kjo situatë politike që pasoi këtu në vendin tonë”, u shpreh ish-ambasadori Baleta.

I pyetur lidhur me pasojat që mund të ketë vendi ynë, Baleta tha se nuk pritet të ketë të tilla. Ai u shpreh se deri më tani, ndihma amerikane në Shqipëri nuk është financiare, por është e madhe në shumë fusha.

“Linja jonë Europiane është ajo e Brukselit, Parisit, Londrës, nuk është ajo e Varshavës. Një pjesë e mirë e këtyre reagimeve që shoh unë, janë në bazë të qëndrimeve të mëparshme. Pra janë grupe që kanë prirje të ndryshme”, tha Baleta.

Leave a Reply

Your email address will not be published. Required fields are marked *