Osmani: Unë dhe Kurti do ta përfaqësojmë Kosovën në Shtëpinë e Bardhë më mirë se delegacioni i fundit

Kryetarja e Kuvendit, Vjosa Osmani, ka deklaruar se kreu i Lëvizjes Vetëvendosje, Albin Kurti, dhe vetë ajo do ta përfaqësojnë Kosovën shumë më mirë në Shtëpinë e Bardhë, sesa delegacioni që ishte së fundmi.

Osmani është pyetur se a mendon se më mirë do ta përfaqësonin Kosovën në Shtëpinë e Bardhë, Albin Kurti, Hashim Thaçi dhe Vjosa Osmani, apo ky delegacioni që ishte me Avdullah Hotin, Selim Selimin dhe Albulena Balajn?

“Shumë më mirë do ta përfaqësonin dhe do ta përfaqësojnë së shpejti besoj, Vjosa Osmani dhe Albin Kurti bashkë”, ka thënë ajo.

Më tej, Osmani është shprehur se kryeministri Hoti nuk ka ditur ta mbrojë Republikën e Kosovës.

“Hoti nuk ka ditur ta mbrojë Kosovën në SHBA, delegacioni kosovar nuk ka insistuar sa duhet për çështjen e njohjes reciproke”, ka thënë Osmani në Prime Time.

Sipas kryeparlamentares Osmani, është delegacioni i Kosovës që ka dështuar në Uashington, dhe nuk duhet fajësuar SHBA.

“Unë nuk do të nënshkruaja asnjë dokument ku nuk figuron Kosova si shtet, delegacioni kosovar ka dështuar në këtë pikë, nuk duhet të fajësohet Amerika”, është shprehur Osmani.

Leave a Reply