S’ka negociata pa plotësimin e kushteve, edhe Holanda ndan Shqipërinë nga Maqedonia e Veriut

Ashtu si Gjermania, edhe Holanda duket se do të ndajë Shqipërinë nga Maqedonia e Veriut në rrugën e integrimit drejt BE.

Parlamenti holandez nuk do të ndryshojë vendimin e tij të qershorit për të bllokuar qeverinë të votojë pro hapjes së negociatave mes BE-së dhe Shqipërisë.

Në qershor, një shumicë e madhe e parlamentit hollandez miratoi një mocion të tre partive për të bllokuar qeverinë nga miratimi i hapjes së negociatave.

Në parim, qeveria mund të injorojë mocionin, megjithëse gjë kjo nuk pritet, pasi qeveria aktuale ka pakicën e vendeve në njërën prej dhomave në parlament dhe rrezikon të bjerë.

Gjatë një takimi të Komisionit Parlamentar për Çështjet Evropiane, Ministri i Punëve të Jashtme Stef Blok konfirmoi se nuk ka “asnjë të dhënë se diçka ka ndryshuar ndërkohë në Shqipëri.”

Blok: Unë besoj se Maqedonia Veriore dhe Shqipëria duhet të vlerësohen në mënyrë të pavarur, sepse ato janë vende të ndryshme me probleme të ndryshme dhe shkallë të ndryshme përparimi. Unë gjithashtu tregova më herët se mendoj se shkalla e përparimit në Maqedoni është qartë më e madhe se ajo në Shqipëri. Marrëveshja me Greqinë për emrin ishte në vetëvete një pikë e rëndësishme e përparimit. 

Shqipëria është me të vërtetë një rast tjetër. Jam dakord me deputetin e kristian-demokrat Pieter Omtzigt në lidhje me këtë. Ekziston gjithashtu një mocion i miratuar nga Z. Omtzigt në lidhje me Shqipërinë për të vendosur veton për hapjen e negociatave të pranimit. Unë gjithashtu mendoj se Shqipëria duhet të jetë në gjendje të fillojë negociatat sapo vendi të plotësojë kriteret. Por me atë rend, kështu që sa më shpejt vendi të plotësojë ato kritere. Ky nuk është ende rasti.

Ministri Blok deklaroi se negociatat me Shqipërinë do të hapen pasi të jenë përmbushur pesë kushte të vendosura nga Këshilli Evropian në vitin 2018.

Kryeministri Edi Rama ka insistuar vazhdimisht që Maqedonia e Veriut dhe Shqipëria duhet të trajtohen njësoj. Në qershor, ai bëri këtë postim në twitter.

Rama: Presidenti @SPendarovski në mënyrë implicite favorizon “shkëputjen nga Shqipëria”? Shumë e çuditshme të dëgjosh këtë, veçanërisht kur merret parasysh kontributi kryesor i Shqipërisë dhe shqiptarëve në shtetin e fqinjit tonë miqësor, zhvillimet demokratike dhe rrugën evropiane. Nuk tingëllon si duhet dhe as praktike sinqerisht!

Ndërkohë, Maqedonia e Veriut ka lobuar në mënyrë aktive për shkëputje. Vendimi i holandezëve dhe gjermanëve për të ndarë të dy vendet është një humbje e ndjeshme për diplomacinë shqiptare.

As Ministri Cakaj dhe as Kryeministri Rama nuk kanë ende  një reagim publik ndaj vendimit të Holandës.

Këtë javë parlamenti gjerman votoi për hapjen e negociatave të pranimit me Shqipërinë, me kushtin që bisedimet teknike të fillojnë vetëm pasi Shqipëria të plotësojë 9 kushtet e vëna nga Gjermania, mes të cilave dhe krijimi i Gjykatës Kushtetuese, Gjykatës së Lartë dhe Reforma Zgjedhore.

Muajin tjetër, Këshilli Evropian pritet të vendosë për hapjen e negociatave të pranimit me Shqipërinë dhe Maqedoninë e Veriut. Ky vendim duhet të jetë unanim. Nëse Holanda vendos veton, nuk ka gjasa që të hapen negociatat me Shqipërinë, ndërkohë që perspektiva për Maqedoninë e Veriut duket më shpresëdhënëse.

*Shkrimi u mor nga exit.al me autorVincent WJ van Gerven Oei

Leave a Reply