Takohen me kryetarin e Komisionit të Jashtëm në PE, David McAllister

Në Strasburg, 30 deputetë të grupit parlamentar demokrat shkuan jo vetëm për të protestuar në mbrojtje të kauzës së tyre, por edhe për të sensibilizuar kolegët e Parlamentit Europian.

E teksa disa prej demokratëve protëstonin jashtë dyerve të PE-së, një përfaqësi e tyre u takua edhe me Kryetarin e Komisionit të Jashtëm në PE-së David McAllister, të cilin Gazment Bardhi tha se e njohën me faktet e arrestimit politik të Sali Berishës, vënien e drejtësisë në shërbim të Kryeministrit dhe mungesën e zgjedhjeve të lira.

Gazment Bardhi: Kemi ngritur çështjen e burgosjes politike të Berishës, Salianjit, të zyrtarëve të tjerë të opozitës. Kemi ndarë faktet sesi Rama injoron zbatimin e vendimeve të Gjykatës Kushtetuese dhe propagandon reformën në drejtësi për të mbrojtur zyrtarët qeveritarë të korruptuar.

Kreu i grupit parlamentar të demokratëve tha se nga eurodeputetët me të cilët kishin zhvilluar përgjatë dy ditëve takime, kishte kërkuar një shtim të vëmendjes lidhur me situatën në Shqipëri.

Gazment Bardhi: Ka gjetur mirëkuptimin për të rritur ndjekjen më nga afër të situatës në Shqipëri.

Në korridoret e Parlamentit Europian, ata takuan edhe Komisionerin për Fqinjësinë dhe Zgjerimin, Olivér Várhelyi, të cilin e informuan mbi situatën politike në Shqipëri dhe duke theksuar se vendi ka nevojë jetike që të rikthehet në shinat e shtetit ligjor dhe demokratik.

Sipas demokratëve, përpjekjet e opozitës për të garantuar shtetin ligjor dhe zgjedhjet e lira në Shqipëri, janë rruga e vetme që e afron Shqipërinë në familjen europiane, mbështetje për të cilën nga Partia Demokratike do të mbetet e pakursyer.