Volodymyr Zelensky do të takohet sot, 26 shtator, me presidentin amerikan Joe Biden dhe zëvendëspresidenten Kamala Harris, në një kohë kur lufta në Ukrainë ka qenë sërish në qendër të fushatës zgjedhore në SHBA për shkak të kritikave të ashpra të presidentit ukrainas.
Zelensky do të takohet pasdite me Biden dhe Harris, kandidaten demokrate për presidente, një ditë pasi Uashingtoni njoftoi 375 milionë dollarë shtesë në ndihmë ushtarake për Ukrainën. Dhe SHBA nuk ka ndërmend të ndalet me kaq.
Biden zotohet të rrisë ndihmën
Presidenti amerikan, në një bisedë të shkurtër me homologun e tij ukrainas dje, të mërkurën, në margjinat e Asamblesë së Përgjithshme të OKB-së, i premtoi atij të rrisë fluksin e ndihmës amerikane për të “ndihmuar Ukrainën të fitojë”.
Detajet e kësaj ndihme do të bëhen të ditura gjatë ditës së sotme.
Nga ana e tij, Zelensky do të prezantojë “planin e fitores” për t’i dhënë fund pushtimit rus.
Synimi i presidentit ukrainas është të gjejë Kievin në një pozicion të fortë përpara se të fillojnë negociatat e paqes.
Zelensky i ka kërkuar edhe një herë Perëndimit që të lejojë ushtrinë ukrainase të godasë objektivat thellë brenda territorit rus me armët që ato ofrojnë, diçka që SHBA, mbështetësi kryesor i Ukrainës, deri më tani ka refuzuar ta aprovojë.
Presidenti ukrainas e di mirë se mbështetja për vendin e tij është kryesisht pezull në prag të zgjedhjeve presidenciale në SHBA.
Sipas sondazheve, Kamala Harris, e cila është zotuar se do të vazhdojë të ndihmojë Kievin nëse zgjidhet, dhe Donald Trump janë në një betejë “kokë më kokë”.
Biden premtoi sot se do të paraqesë “një seri masash për të forcuar mbështetjen për forcat e armatosura ukrainase”, por kandidati republican, dhe paraardhësi i tij në presidencë, ka qenë kritik ndaj Zelenskit ditët e fundit.
Edhe pse u përmend mundësia e takimit të Trump me Zelensky-n, kjo tashmë duket të përjashtohet, sipas shtypit amerikan.
Presidenti ukrainas do të shkojë gjithashtu në Kapitol për t’u takuar me deputetë të rangut të lartë, kryesisht në Senat.
Kritika nga republikanët
Por ai nuk do të zhvillojë bisedime me Mike Johnson, kryetarin republikan të Dhomës së Përfaqësuesve.
Johnson është ndër republikanët që kritikuan ashpër vizitën e Zelenskiy të dielën në një fabrikë municionesh në Pensilvani, ku ai u shfaq me guvernatorin e shtetit John Shapiro, i cili është një mbështetës i vendosur i kandidaturës Harris, Sen. Bob Casey dhe deputeti Matt Cartëright, të gjithë demokratë .
Pensilvania është një nga shtetet e pavendosur që do të vendosë rezultatin e zgjedhjeve presidenciale dhe Mike Johnson akuzoi ekipin e liderit ukrainas për organizimin e një “fushate” në favor të demokratëve.
“Zjarr” Trump kundër Zelensky
“Këto qytete janë të humbura, janë të humbur dhe ne vazhdojmë t’i japim miliarda dollarë një njeriu që refuzon të bëjë një marrëveshje, Zelensky-t,” u ankua Trump dje, të mërkurën, gjatë një mitingu fushatës.
“Nuk ka asnjë marrëveshje që ai mund të kishte nënshkruar që do të ishte më e keqe se situata që kemi tani”, vazhdoi republikani, duke theksuar se “ne kemi një vend që është zhdukur, nuk mund të rindërtohet”.
“Sa herë që vjen në vendin tonë, ai largohet me 60 miliardë dollarë, mendoj se ai është biznesmeni më i mirë në planet”, tha ai nga Karolina e Veriut.
Tashmë, komiteti mbikëqyrës i Dhomës së Përfaqësuesve, ku shumica përbëhet nga republikanët, ka njoftuar se do të shqyrtojë nëse vizita e Zelensky ishte një përpjekje për të përdorur një udhëheqës për të promovuar fushatën e rizgjedhjes së Harris.
