Një anije turistike me udhëtarë izraelitë është detyruar të ndryshojë itinerarin dhe të drejtohet drejt Qipros, pasi u ndalua të ankoronte në ishullin grek Syros për shkak të një proteste në breg, lidhur me luftën në Gaza.

Rreth 1,600 pasagjerë izraelitë në bordin e anijes Crown Iris nuk u lejuan të zbresin për shkak të shqetësimeve për sigurinë, pasi më shumë se 300 demonstrues në ishullin e Qikladit shprehën pakënaqësi të fortë ndaj qëndrimit të Izraelit në konfliktin me Palestinën dhe trajtimin e palestinezëve në Gaza. Protestuesit mbajtën një pankartë të madhe me mbishkrimin “Ndalo Gjenocidin”, bashkë me flamuj palestinezë.

Në një deklaratë, protestuesit shprehën shqetësim edhe për afrimin e marrëdhënieve ekonomike, teknologjike dhe ushtarake midis Greqisë dhe Izraelit. “Si banorë të Syros dhe mbi të gjitha si njerëz, po veprojmë për të ndihmuar në ndalimin e këtij shkatërrimi që po shkaktohet nga kjo luftë gjenocidiale në lagjen tonë,” thuhej në deklaratë.

Kompania izraelite Mano Maritime, operatori i anijes, konfirmoi ngjarjen, duke njoftuar se: “Anija arriti në Syros, ku u përball me një demonstratë të mbështetësve pro-palestinezë dhe pasagjerët mbetën në bord pa leje për të zbritur.”

Ministri i Jashtëm izraelit, Gideon Saar, ka kontaktuar homologun e tij grek, George Gerapetritis, për ngjarjen, konfirmoi Ministria e Jashtme greke, pa dhënë detaje mbi bisedën.

Megjithëse protesta përfundoi pa incidente apo arrestime, ajo nxori në pah shqetësimet në rritje në Greqi për veprimet e Izraelit në Gaza. Pankartat në mbështetje të palestinezëve janë bërë gjithnjë e më të pranishme në qytetet greke.