Përfaqësuesi i Princ Harry ka denoncuar sjelljen “të papërgjegjshme” të fotografëve pranë shkollës ku mësojnë dy fëmijët e tij me Meghan Markle. Reagimi erdhi pasi u vu re prania e dy burrave pranë institucionit arsimor, të cilët dyshohet se po fotografonin dhe vëzhgonin ambientet e shkollës.

“Vendimi i fotografëve për t’u sjellë në këtë mënyrë pranë një shkolle është një papërgjegjshmëri e madhe”, deklaroi zëdhënësi i Princ Harry, në një reagim të përcjellë për Agjencinë Franceze të Lajmeve (AFP).

Sipas përfaqësuesit, ekziston një dallim i qartë mes aktivitetit të ligjshëm të mediave dhe veprimeve të fotografëve që qarkullojnë rreth një shkolle, ndalojnë për të parë brenda ambienteve të saj dhe ndjekin fëmijët gjatë aktiviteteve të tyre të përditshme.

Harry dhe Meghan, së bashku me dy fëmijët e tyre, 7 dhe 5 vjeç, u rikthyen në Britani në fund të gushtit, pas gjashtë vitesh qëndrimi në Shtetet e Bashkuara. Çifti u largua nga detyrat si anëtarë aktivë të familjes mbretërore dhe prej atëherë ka pasur një marrëdhënie të tensionuar me institucionin mbretëror.

Çështja e sigurisë së familjes së Princ Harry ka qenë prej vitesh një temë e ndjeshme, ndërsa ai ka shprehur vazhdimisht shqetësimin për ekspozimin mediatik të fëmijëve të tij. Në këtë rast, përfaqësuesi i tij theksoi se fotografimi apo vëzhgimi i fëmijëve pranë shkollës tejkalon kufijtë e aktivitetit normal të medias.