Presidenti ukrainas Volodymyr Zelensky  ka anuluar udhëtimet e tij në Spanjë dhe Portugali, të cilat ishin planifikuar të zhvilloheshin në fund të kësaj jave.

Zelensky do të takohej me kryeministrin spanjoll Pedro Sánchez  në Moncloa dhe mbretin Felipe VI në Pallatin Mbretëror në Madrid të premten më 17 maj.

Megjithëse qeveria spanjolle nuk e kishte konfirmuar zyrtarisht se kur do të zhvillohej vizita e Zelenskyt për arsye sigurie, mediat spanjolle kishin raportuar se presidenti ukrainas do të ishte mysafir nderi në një drekë në Pallatin Mbretëror pas një takimi me Sánchez.

Mediat spanjolle dhe portugeze deklarojnë se arsyeja kryesore e anulimit së udhëtimit të tij është situata e vështirë në disa fronte të luftës në Ukrainë.

Në veçanti, avancimi i trupave ruse në Kharkiv, një rajon strategjik për interesat e Ukrainës, bëri që Zelensky të rishqyrtojë udhëtimin e tij jashtë vendit dhe të qëndrojë në Ukrainë për të koordinuar përgjigjen ndaj agresionit rus dhe për të menaxhuar krizën humanitare në vazhdim.

Presidenti Zelensky thuhet se do të nënshkruante një marrëveshje të re dypalëshe të sigurisë me Spanjën gjatë vizitës së tij në vend.

Udhëheqësi ukrainas ishte për herë të fundit në Spanjë në tetor 2023 për takimin e Komunitetit Politik Evropian të mbajtur në Granada.

Madridi njoftoi në prill se do të dërgonte raketa interceptuese kundërajrore Patriot me rreze të gjatë veprimi në Ukrainë për të ndihmuar vendin t’i rezistojë sulmeve ruse.