Policia e Fierit dhe Lushnjës ka vënë në pranga tre shtetas, pas një serie zjarrvëniesh të qëllimshme në zona të ndryshme, të cilat rrezikuan banesa dhe shkaktuan dëme në mjedis.

Në Fier, u arrestua në flagrancë shtetasi F. B., 68 vjeç, banues në lagjen “Bishanak”, i cili u kap duke ndezur zjarr pranë argjinaturës së lumit Gjanica. Si pasojë e përhapjes së flakëve, u dogj një sipërfaqe toke me bimësi të egër. 68-vjeçari ka precedent të mëparshëm penal për zjarrvënie dhe dhunë në familje. Ai dyshohet gjithashtu për ndezjen e tre vatrave të tjera në lagjen ku banon.

Në Lushnjë, u arrestuan dy persona të tjerë:

G. H., 61 vjeç, banues në lagjen “18 Tetori”, i cili dyshohet se ka ndezur zjarr në tokën e tij për të djegur mbeturinat. Flakët janë përhapur deri te ish-fusha e mbetjeve urbane, duke rrezikuar banesat përreth.

N. D., 62 vjeç, banues në fshatin Delisufaj, akuzohet se ka ndezur zjarr pranë banesës së tij për të djegur mbeturina, duke shkaktuar përhapjen e flakëve në një sipërfaqe të konsiderueshme dhe duke vënë në rrezik banesat e fshatit.

Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme ligjore.

Policia e Fierit apelon qytetarët që të shmangin ndezjen e zjarreve në çdo rrethanë, pasi do të përballen me ndëshkim penal. Çdo rast zjarrvënieje apo paligjshmërie mund të denoncohet në numrin 112, me garanci për anonimat dhe reagim të menjëhershëm.