Para se gjykata të shprehej për vendimin e saj, u detyrua që të përjashtojë nga salla Ratko Mladiçin, i cili protestoi dhe përmes avokatit të tij kërkoi shtyrjen e vendimit për arsye shëndetësore, kërkesë që u rrëzua nga gjykata.

“Roli i të akuzuarit provohet se ka qenë thelbësor dhe domethënës në kryerjen e krimeve të ndodhura, krime që pa këtë rol nuk do të kishin ndodhur në këtë masë. I akuzuari ishte në dijeni dhe ka nxitur krimet kundër kroatëve dhe boshnjakëve”, argumentoi gjykata.

I ashtuquajturi “kasapi i Ballkanit” u përball këtë të mërkurë me gjykimin për masakrën më të madhe në Europë që prej Luftës së Dytë Botërore. Mbi të rëndonin akuzat e gjenocidit në Srebrenicën e vitit 1995, gjenocidit në 6 komuna të tjera boshnjake në vitin 1992, persekutimin e boshnjakëve dhe kroatëve në të gjithë Bosnje-Hercegovinën, terrorizimin e banorëve të Sarajevës me fushatën e bombardimeve dhe goditjeve me snajper, si dhe për marrjen peng të personelit të OKB-së.

Mladiç u arrestua në vitin 2011 pas më shumë se 15 vitesh arrati. Rreth 300 vetë janë ulur në bankën e dëshmitarëve gjatë procesit të tij, e gjykatës së OKB-së në Hagë iu paraqitën gati 10 mijë prova.

150 përfaqësues të viktimave të luftës në Bosnje mbërritën në Hagë që një ditë përpara, në pritje të vendimit për drejtësi.

Të pranishëm ishin edhe i biri i Mladiçit dhe disa zyrtarë serbo-boshnjakë, por ata qëndruan në një zonë të shkëputur. Pavarësisht mizorive, për të cilat është drejtpërdrejtë përgjegjës, gjenerali famëkeq vazhdon të shihet me admirim nga një pjesë e serbëve.

Vet presidenti serbo-boshnjak, Milorad Dodik, i cili dëshmoi në gjyq të martën, u shpreh një ditë më parë se Mladiç e drejtoi me profesionalizëm dhe patriotizëm ushtrinë serbo-boshnjake gjatë luftës, e shtoi se pavarësisht të gjithave, ai mes serbëve mbetet një legjendë.