Lufta mes Izraelit dhe Hamasit ka hyrë në një fazë edhe më të tensionuar pas dështimit të një sulmi izraelit në Doha kundër një prej liderëve të Hamasit, teksa diplomacia ndërkombëtare dhe protestat në Izrael po rrisin presionin mbi kryeministrin e akuzuar nga Gjykata Ndërkombëtare Penale, Benjamin Netanyahu.
Sulmi ajror që synonte eliminimin e Khalil al-Hayya, një nga negociatorët kryesorë të Hamasit, nuk arriti objektivin e tij. Incidenti ka nxitur kritika ndaj Netanyahut nga familjet e pengjeve në Gaza, të cilat e akuzojnë se po pengon arritjen e një marrëveshjeje për lirimin e tyre, raporton La Repubblica.
Ndërkohë, Asambleja e Përgjithshme e OKB-së miratoi me 142 vota “Deklaratën e Nju Jorkut”, që kërkon hapjen e rrugës për njohjen e Palestinës dhe që sugjeron kalimin e administrimit të Gazës tek Autoriteti Kombëtar Palestinez.
Në frontin diplomatik, Katari ka thirrur një samit të vendeve arabe dhe islame të hënën për të dënuar sulmin izraelit në territorin e tij. Sipas Al Jazeera-s, projektrezoluta që pritet të diskutohet synon të japë një “sinjal të qartë” kundër “agresionit izraelit”.
Nga ana tjetër, Sekretari i Shtetit i SHBA-ve, Marco Rubio, tha se Uashingtoni “nuk ishte i kënaqur” me sulmin izraelit në Katar, por theksoi se kjo nuk do të ndryshojë natyrën e marrëdhënieve mes dy paleve, edhe pse pritet të diskutohen pasojat për përpjekjet drejt një armëpushimi në Gaza.
Raportime të tjera nga La Repubblica tregojnë se Mossad-i kishte refuzuar të përdorte agjentë në terren në Doha për këtë operacion, duke preferuar një qasje më të fshehtë. Ky vendim, sipas burimeve të cituara nga Washington Post, pasqyron shqetësime për marrëdhëniet me Katarin, i cili po ndërmjetëson për lirimin e pengjeve.
Në Tel Aviv, qindra qytetarë dhe familjarë të pengjeve marshuan sërish, duke kërkuar që qeveria të përfundojë luftën dhe të arrijë një marrëveshje për lirimin e të afërmve të tyre.
Ndërkohë, një flotilje ndërkombëtare humanitare, Global Sumud Flotilla, ka nisur lundrimin nga Tunizia drejt Gazës, me qëllimin për të sjellë ndihma për popullsinë e rrethuar nga konflikti.
