Koreja e Veriut ka ofruar për herë të parë një pamje nga një objekt i pasurimit të uraniumit që prodhon materiale për armët e saj bërthamore.

Fotografitë treguan liderin Kim Jong Un, i cili më parë ishte zotuar se do të rriste në mënyrë eksponenciale sasinë e armëve bërthamore të vendit, duke inspektuar zonën.

Agjencia Qendrore Koreane e Lajmeve (KCNA) tha në një raport të premten se ai kishte kërkuar në mënyrë të ngjashme që objekti i uraniumit të rriste prodhimin e tij.

Uraniumi i pasuruar është thelbësor në prodhimin e kokave bërthamore.

Fotografia tregon Kim duke ecur pranë rreshtave të centrifugave dhe duke folur me zyrtarët ushtarakë. Publikimi i tyre vjen mes tensioneve të rritura në gadishullin Korean.

“Kim shkoi rreth dhomës së kontrollit të bazës së pasurimit të uraniumit për të mësuar rreth funksionimit të përgjithshëm të linjave të prodhimit,” raportoi KCNA.

Qeveria e Koresë së Jugut ka thënë se dënon fuqishëm planet e Veriut për të rritur prodhimin.

Është e paqartë se kur Kim bëri vizitën dhe nëse lokacioni është në kompleksin bërthamor të Veriut në Yongbyon, i cili prodhon materiale të zbërthyeshme për armët bërthamore të Phenianit.

Ministria e Bashkimit të Koresë së Jugut ka dënuar Veriun për publikimin e objektit, duke shtuar se vendosja e paligjshme e armëve bërthamore shkel disa rezoluta të vendosura nga Këshilli i Sigurimit i OKB-së.