Ministria e Punëve të Brendshme, pas pikë kalimit kufitar me Serbinë në Bërnjak, ka mbyllur edhe atë në Merdar.

Ministri i Punëve të Brendshme, Xhelal Sveçla, ka njoftuar se pikë kalimi kufitar në Merdar është mbyllur pas veprimeve të njëjta si në Bërnjak të ekstremistëve të maskuar serbë brenda territorit të Serbisë.

“Pas veprimeve të njëjta të ekstremistëve të maskuar serb brenda territorit të Serbisë, që po ndalojnë në mënyrë selektive e me qasje fashiste ndaj qytetarëve që duan të kalojnë tranzit përmes Serbisë dhe gjithë kjo para syve të autoriteteve të Serbisë, mbyllet edhe pika kufitare në Merdar”, ka shkruar Sveçla në një postim në Facebook.

Ai ka thënë se “në mbrojtje të jetës dhe për sigurinë e të gjithë qytetarëve tanë, edhe kjo pikë si ajo në Bërnjak do të jetë e mbyllur deri në ndalim të veprimeve të tilla selektive e fashiste e normalizim të plotë të situatës”.

Sveçla më herët tha se pikëkalimi në Bërnjak është mbyllur për qarkullim pasi persona “të maskuar” janë duke i “ndaluar veturat dhe legjitimuar udhëtarët” në pjesën serbe të kufirit.

Ekipi i shërbimit të Ballkanit i Radios Evropa e Lirë ka parë persona të maskuar afër bllokadës të vendosur në pjesën serbe të kufirit në Bërnjak.