Presidenti Donald Trump nuk e hodhi poshtë idenë për të kërkuar një mandat të tretë në Shtëpinë e Bardhë, pavarësisht se Amendamenti i 22-të i Kushtetutës e ndalon atë, duke pretenduar se “ka metoda” për ta arritur këtë dhe duke theksuar se ai “nuk po bën shaka”.

“Shumë njerëz duan që unë ta bëj këtë. Por mendimi im është se kemi një rrugë të gjatë për të bërë. Jam i fokusuar në të tashmen,” tha Trump në një intervistë telefonike me Kristen Welker të NBC News të dielën.

Amendamenti i 22-të i Kushtetutës, i cili u ratifikua në vitin 1951, thotë: “Asnjë person nuk mund të zgjidhet në detyrën e Presidentit më shumë se dy herë”.

“Ka metoda që kjo mund të bëhet,” tha presidenti kur u pyet nëse ka strategji në tryezë për ta lejuar atë të kërkojë një mandat tjetër.

Welker përmendi një plan të mundshëm në të cilin zëvendëspresidenti JD Vance do të kandidonte në vitin 2028 dhe më pas do t’ia kalonte stafetën Trumpit.

“Epo, kjo është një mundësi. Por ka edhe të tjera,” tha presidenti.

“Unë nuk bëj shaka,” i tha Trump Welker, duke përsëritur, “Është shumë herët për të menduar për këtë.”

Trump e ka përmendur shpesh një mandat të tretë, duke thënë në një tubim në Nevada në janar se “do të jetë nderi më i madh i jetës sime të shërbej, jo një herë, por dy ose tre herë ose katër herë”.

Shfuqizimi ose ndryshimi i Amendamentit të 22-të do të kërkonte dy të tretat e votave si në Dhomë ashtu edhe në Senat dhe ratifikimin nga tre të katërtat e shteteve. I vetmi president që shërbeu më shumë se dy mandate ishte Franklin D. Roosevelt. Amendamenti i 22-të u ratifikua në vitin 1951, në vitet pas vdekjes së Roosevelt në detyrë.

“Është e paligjshme. Ai nuk ka asnjë shans. Kjo është gjithçka që mund të thuhet”, tha për CNN muajin e kaluar Michael Waldman, president dhe CEO i Qendrës Brennan për Drejtësi në shkollën juridike të Universitetit të Nju Jorkut.

Në fund të mandatit të tij të dytë në janar 2029, Trump do të jetë personi më i vjetër që do të mbajë ndonjëherë presidencën në moshën 82 vjeç e 7 muaj, duke kaluar rekordin e paraardhësit të tij Joe Biden. Biden ishte 82 vjeç e 2 muaj kur u largua nga detyra.