Shefja e MPD-së Pamela Smith konfirmoi se 33 protestues janë arrestuar

Policia amerikane shpërndau sot protestuesit propalestinezë nga tendat e vendosura në Universitetin George Washington, transmeton Anadolu.

Sipas një deklarate të Departamentit të Policisë Metropolitane (MPD) në Washington, disa arrestime janë bërë gjithashtu gjatë shpërndarjes së protestuesve.

Shefja e MPD-së Pamela Smith konfirmoi gjatë një konference për shtyp së bashku me kryebashkiaken e Washingtonit Muriel Bowser se 33 protestues janë arrestuar.

Smith tha se demonstratat, të cilat fillimisht filluan në mënyrë paqësore, kohët e fundit ishin kthyer në të dhunshme, duke nxitur vendimin e tyre për të ndërhyrë.

Oficerët e policisë filluan largimin e tendave rreth orës 3:00 të mëngjesit me kohën lokale pasi protestuesve iu dhanë disa paralajmërime për të pastruar kampin.

Kampimi zgjati dy javë, gjatë të cilit studentët nga Universiteti George Washington dhe disa të tjerë u mblodhën në kampus më 25 prill dhe kërkuan që shkollat e tyre të distancoheshin nga Izraeli.

Disa protestues u spërkatën me lotësjellës, sipas pamjeve në mediat sociale.

Shpërndarja erdhi gjithashtu disa orë përpara dëshmive të planifikuara nga Bowser dhe Smith përpara një seance dëgjimore nga Komiteti i Dhomës për Mbikëqyrjen dhe Përgjegjshmërinë mbi trajtimin e protestës nga kryeqyteti amerikan.

Kryetari i Komitetit James Comer më vonë njoftoi se seanca u anulua pasi policia “pastroi përfundimisht kampin e paligjshëm” në kampusin e universitetit.

Protestat propalestineze në kampuse kanë qenë të vazhdueshme që nga 17 prilli, kur studentët në Universitetin Columbia të New Yorkut nisën një kamp në shenjë solidariteti me Gazën dhe kërkuan që institucioni i tyre akademik të distancohej nga Izraeli./AA