Qindra demonstrues u mblodhën para ndërtesës së ambasadës izraelite në Washington, ku ushtari amerikan Aaron Bushnell i vuri flakën vetes këtë javë në mbështetje të Gazës duke deklaruar se “nuk do të jetë palë e gjenocidit”, dhe protestuan kundër sulmeve të vazhdueshme të Izraelit në Gaza dhe mbështetjen e administratës amerikane për të, raporton Anadolu.

Demonstruesit, të cilët dolën para ndërtesës së ambasadës izraelite me flamuj palestinezë, mbanin pankarta me mbishkrime si “Palestina e Lirë”, “Fund okupimit”, “Ndalo gjenocidin” dhe “Të ndalet ndihma e SHBA-së për Izraelin”.

Të paktën 30.320 njerëz janë vrarë dhe 71.533 janë plagosur në sulmet izraelite në Gaza që nga 7 tetori, sipas Ministrisë së Shëndetësisë të enklavës. Rreth 1.200 njerëz thuhet se janë vrarë në sulmin fillestar të grupit palestinez Hamas.

Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.