Grupi rus Wagner heq dorë nga planet për t’u tërhequr nga qyteti Bakhmut pasi mori premtime për armë shtesë

Rusia nisi një valë sulmesh me dronë, raketa dhe ajrore në Kiev dhe qytete të tjera ukrainase. Sulmet nisën teksa Moska përgatitet për festën Ditën e Fitores.

Rreth 61 sulme ajore shënjestruan qytetet e rajoneve Kharkiv, Kherson, Mykolaiv dhe Odesa. Shtabi i Përgjithshëm i Forcave të Armatosura të Ukrainës deklaroi se rreth 52 raketa u hodhën në zonat e populluara të Ukrainës.

Mbrojtja ajrore e Ukrainës shkatërroi të gjithë 35 dronët Shahed të prodhuar nga Irani që Rusia hodhi. Pesë persona mbetën të plagosur në në kryeqytet ndërsa u shkatërruan një sërë ndërtesash, infrastruktura dhe një depo karburanti.

Administrata ushtarake e Kievit tha se mbeturinat e një droni Iranian ranë në një pistë në aeroportin Zhuliany, por pa shkaktuar viktima. Alarmet për sulm ajror u lëshuan për orë të tëra në afërsisht dy të tretat e Ukrainës dhe shpërthime u dëgjuan gjithashtu edhe  në rajonin jugor të Kherson dhe Zaporizhzhian juglindore.

Nga ana tjetër kreu i grupit rus Wagner ka hequr dorë nga planet për të tërhequr forcat e tij nga Bakhmut, në Ukrainën lindore.

Në një mesazh të postuar në kanalin e tij Telegram, Prigozhin u shpreh: “Morëm një urdhër luftarak, për herë të parë në gjithë këtë kohë. Na është premtuar aq municion dhe armë sa na nevojitet për të vazhduar operacionet e mëtejshme. Na është premtuar gjithçka që nevojitet për të parandaluar armikun të na ndërpresë betejën tonë”.

Javën e kaluar kreu Yevgeny Prigozhin fajësoi personalisht krerët e lartë të ushtrisë ruse për humbjet e pësuara nga luftëtarët e tij.

Ndërkaq mbi 1,679 njerëz, përfshirë 660 fëmijë, janë evakuuar nga zonat pranë uzinës bërthamore të Zaporizhzhia. 

Kreu i mbikëqyrësit të energjisë bërthamore të OKB-së, Rafael Grossi, ka paralajmëruar se situata rreth uzinës është bërë “potencialisht e rrezikshme” me Ukrainën që pritet të nisë një kundërofensivë të shumëpritur për të rimarrë së shpejti territorin.

Sulmet janë intensifikuar gjithashtu në dy javët e fundit ndaj objektivave të mbajtura nga Rusia, veçanërisht në Krime.

Ukraina nuk ka konfirmuar ndonjë rol në ato sulme, por thotë se shkatërrimi i infrastrukturës së armikut është përgatitje për sulmin e saj të shumëpritur tokësor.