Qeveria amerikane njoftoi se po largon një pjesë të personelit të saj nga Lindja e Mesme, pasi Irani kërcënoi të sulmonte bazat ushtarake amerikane në rast të një konflikti të armatosur për shkak të dështimit të negociatave midis Uashingtonit dhe Teheranit mbi programin e energjisë bërthamore të Republikës Islamike.
Nëse “na imponohet një konflikt, pala tjetër do të pësojë padyshim më shumë humbje se ne”, tha Ministri iranian i Mbrojtjes, Aziz Nasirzadeh.
“Bazat e tyre janë brenda rrezes sonë” dhe “SHBA-të do të detyrohen të largohen nga rajoni”, shtoi ai.
SHBA-të kanë disa baza ushtarake përreth Iranit, më e madhja prej të cilave është në emiratin e Katarit.
Donald Trump konfirmoi largimin e personelit amerikan nga zona, “sepse mund të bëhet e rrezikshme” në ditët në vijim, siç e tha ai.
Më parë, zyrtarët amerikanë njoftuan se stafi i ambasadës në Irak po reduktohej për arsye sigurie. Sipas Departamentit të Shtetit, u miratuan edhe largime vullnetare nga Bahreini dhe Kuvajti.
Agjencia e sigurisë detare UKMTO, e cila drejtohet nga marina britanike, ka lëshuar një njoftim informues duke paralajmëruar për “tensione në rritje” në Lindjen e Mesme, të cilat mund të shkaktojnë “një përshkallëzim të aktivitetit ushtarak me një ndikim të drejtpërdrejtë te detarët”.
Irani dhe SHBA-të, në mosmarrëveshje që nga Revolucioni Islamik i vitit 1979, kanë zhvilluar pesë raunde bisedimesh që nga prilli mbi programin e energjisë bërthamore të Republikës Islamike, të ndërmjetësuara nga Sulltanati i Omanit.
Bisedime të reja janë planifikuar për të dielën, sipas Teheranit. Trump tha se takimi do të zhvillohet sot. Omani nuk ka komentuar.
“Jam i sigurt se do të bëjmë një marrëveshje me Iranin, tha presidenti amerikan në një podcast të New York Post.
“Ata duket se janë të pakujdesshëm”, tha Trump, i cili ka kërcënuar vazhdimisht se do të urdhërojë një sulm ushtarak nëse diplomacia dështon. “Do të ishte më mirë” të zgjidhej çështja “pa luftë”, shtoi ai.
Sipas informacioneve, forcat e armatosura izraelite po hartojnë planet e tyre për të goditur objektet bërthamore të Iranit, diçka që edhe presidenti amerikan e ka përmendur rastësisht.
SHBA-të dhe Irani po përpiqen të arrijnë një marrëveshje që do ta pengonte Iranin të pajiset me armë bërthamore, diçka që Teherani e mohon me forcë se po e kërkon, në këmbim të heqjes së sanksioneve që po e dëmtojnë ekonominë e vendit.
Një pengesë e madhe për bisedimet është çështja e pasurimit të uraniumit.
Uashingtoni kërkon që Irani ta braktisë plotësisht këtë aktivitet. Irani e hedh poshtë pretendimin amerikan, duke theksuar se ka të drejtë ta vazhdojë atë sipas Traktatit për Mospërhapjen Bërthamore (NPT), në të cilin është palë.
Sipas Agjencisë Ndërkombëtare të Energjisë Atomike (IAEA), Irani është i vetmi shtet në botë që nuk posedon armë bërthamore, por pasuron uranium në një nivel të lartë (60%), shumë mbi limitin prej 3.67% të vendosur në marrëveshjen ndërkombëtare të vitit 2015, zyrtarisht Plani i Përbashkët Gjithëpërfshirës i Veprimit (JCPOA), nga e cila SHBA u tërhoq në mënyrë të njëanshme në vitin 2018, gjatë mandatit të parë të Trump në detyrë.
Për të ndërtuar një bombë atomike, pasurimi duhet të arrijë 90% , sipas IAEA-s./vizionplus.tv
