Presidenti tha se ai dhe ekipi i tij i sigurisë kombëtare e kanë vëzhguar nga afër situatën në Afganistan, edhe pse Biden nuk ka folur para kamerave për këtë çështje.

Presidenti amerikan pranoi se bota tani po sheh një “kolaps” të qeverisë afgane, por këmbënguli se misioni amerikan nuk supozohej të ishte për ndërtimin e kombit, por për parandalimin e një sulmi terrorist në tokën amerikane.

Biden vijoi të mbronte vendimin e tij për të tërhequr trupat  amerikane nga Afganistani dhe pse kur forcat talebane morën Kabulin, bota pa imazhe të afganëve të dëshpëruar që po përpiqeshin të largoheshin nga vendi.

“Unë qëndroj plotësisht prapa vendimit tim. Pas 20 vjetësh, kam mësuar në mënyrën më të vështirë se kurrë nuk ka qenë një kohë e mirë për të tërhequr forcat amerikane”, tha Biden.

Presidenti amerikan kritikoi udhëheqësit e qeverisë afgane për ikjen nga vendi dhe trupat afgane që dështuan në mbrojtjen e vendit të tyre, ndaj veprimi që duhet të ndërmerrte ishte largimi i trupave amerikane.

“E vërteta është, kjo ndodhi më shpejt nga sa kishim parashikuar. Sa gjenerata të tjera të vajzave dhe djemve do të linim të luftonin luftën civile në Afganistan ndërsa trupat afgane nuk do ta bënin?” – theksoi presidenti i Amerikës.

Biden tha se qeveria afgane dështoi pasi nuk e mori parasysh sugjerimin e tij që të negocionte me talebanët.  “Zoti Ghani këmbënguli se forcat afgane do të luftonin. Por padyshim që ishte gabim”, tha Biden.

Joe Biden paralajmëroi se SHBA do të vepronte shpejt nëse tabelanët do të sulmonin qytetarët amerikanë apo do të përpiqeshin që të shkatërronin përpjekjet e evakuimit në Kabul.

“Nëse është e nevojshme, ne do t’i mbrojmë njerëzit tanë me forca shkatërruese”, tha Biden.

Presidenti tha se, pasi të gjitha përpjekjet për evakuim të kenë përfunduar me sukses, SHBA do të ecë përpara me përfundimin e misionit të saj të tërheqjes dhe për t’i dhënë fund “luftës më të gjatë të Amerikës”.

“Ngjarjet që ne shohim tani janë fatkeqësisht dëshmi se asnjë forcë ushtarake nuk do të siguronte kurrë një Afganistan të qëndrueshëm, të bashkuar, të sigurt. Jam presidenti i katërt amerikan që kryesoj luftën në Afganistan. Dy demokratë dhe dy republikanë. Unë nuk do t’ia kaloj këtë përgjegjësi një presidenti të pestë”, tha Biden me bindje.

Çfarë ndodhi në Afganistan

Qindra njerëz që vrapojnë teksa përpiqen të kapin avionët ushtarakë në  ikje, dhe ndërkohë shtypin njëri tjetrin, këto ishin pamjet nga Kabuli që  shokuan botën.

Një kaos i pashembullt, ndërsa pamjet tregonin edhe njerëz që binin nga avionët e tejmbushur.

Të paktën tre persona raportohet të kenë rënë nga avionët, ndërsa 5 të tjerë kanë humbur jetën në përpjekjet e dhunshme për tu futur në avionë.

Ndërkohë të tjerë u panë gjithashtu të  vraponin përkrah – dhe para – një aeroplani të Forcave Ajrore të SHBA që po përgatitej për ngritje.

Situata në Afganistan mori kthesën dramatike pasi të dielën me marrjen e Kabulit talebanët shpallën fitoren duke thënë se tashmë lufta ka marrë fund.

Ata festuan në Pallatin Presidencial” në Kabul në zyrën e presidentit tashmë të larguar Ashraf Gani.

Në një konferencë për shtyp talebanët thanë se ata janë gati për dialog me të gjitha zyrtarët afganë por dhe bashkësinë ndërkombëtare

Në reagimet e këtyre të fundit Rusia, Kina kanë thënë se do të mbajnë lidhje me talebanët.

Në një deklaratë të qeverisë kineze thuhet se ata janë të gatshëm të zhvillojnë marrëdhënie miqësore dhe bashkëpunuese me Afganistanin.

Rusia nga ana tjetër ka bërë me dije se ata janë në kontakt me talebanët nëpërmjet ambasadës së  tyre dhe se nuk do të nxitohen në njohjen ose jo të qeverisë që do krijohet atje.

Ndërsa Sekretari i Përgjithshëm i Kombeve të Bashkuara, Antonio Guterres  tha se Komuniteti ndërkombëtar duhet të bashkohet për t’u siguruar që Afganistani të mos përdoret më kurrë si një strehë e sigurt për organizatat terroriste. Guterres i kërkoi Këshillit që të përdorë “të gjitha mjetet” për të siguruar respektimin e të drejtave të njeriut në Afganistan.