Presidenti ukrainas, Volodymyr Zelensky, u bëri apel evropianëve që të qëndrojnë të bashkuar në mbështetje të Ukrainës.

Zelensky mbërriti sot në Pallatin Blenheim, pranë Oksfordit, në Britani, ku po merr pjesë në takimin e Komunitetit Politik Evropian.

“Është shumë e rëndësishme të ruhet uniteti në Evropë, sepse uniteti gjithmonë lejon që të merren vendime të forta,” vuri në dukje Zelensky.

Zelensky kishte njoftuar më herët vendimin e tij për të udhëtuar drejt Britanisë, ku u takua me kryeministrin e sapozgjedhur Keir Starmer dhe mbretin Charles.

“Do të takoj Madhërinë e Tij Mbretin Charles III, kryeministrin Keir Starmer, gjatë udhëtimit në Britani”, sqaroi ai.

Udhëheqësi ukrainas ndau gjithashtu fotot e tij nga aeroporti me Valery Zaluzny, ambasadorin e sapoemëruar të Ukrainës në Londër, i cili më parë ishte kreu i forcave të armatosura të Ukrainës.

“Është shumë e rëndësishme që unë jam këtu, për Ukrainën, sidomos në këtë periudhë të vështirë të luftës”, shtoi ai në deklaratat që bëri para gazetarëve në Blenheim.

“Që nga ditët e para të pushtimit (të Rusisë) në Ukrainë, Britania e Madhe ka qenë një nga mbështetësit më të mëdhenj të Ukrainës. Ne kemi nevojë për këtë lloj angazhimi për t’i dhënë fund terrorizmit rus”, theksoi presidenti ukrainas.