Një kopsht zoologjik francez është mbyllur përkohësisht nga autoritetet lokale pasi një tufë me nëntë ujqër u larguan nga rrethimi i tyre gjatë orarit të vizitave.

Asnjë person nuk u lëndua gjatë incidentit fundjavën e kaluar në kopshtin zoologjik Trois Vallées në Montredon-Labessonnie, Franca jugore.

Kafshët shkatërruan kapakët e sigurisë dhe u ngjitën në një gardh, por nuk dolën kurrë jashtë kopshtit zoologjik.

Katër u qëlluan për vdekje për “sjellje të rrezikshme”, tha zyrtari lokal Fabien Chollet për agjencinë e lajmeve AFP.

Pesë të tjerët u kthyen në ambientet e tyre dhe u anestezuan nga zyrtarët lokalë që ishin thirrur në vendngjarje.

“Nuk kishte shumë njerëz në kopshtin zoologjik në atë kohë dhe në asnjë moment publiku nuk ishte në rrezik”, tha zoti Chollet.

Por ai shtoi se kopshti zoologjik duhej të mbyllej derisa të garantohej siguria.

Në faqen e saj të internetit, kopshti zoologjik Trois Vallées tha se do të mbyllet deri në mes të janarit për shkak të “punimeve urgjente”.

Pronari i parkut Sauveur Ferrara i tha AFP se ujqërit kishin mbërritur vetëm kohët e fundit në kopshtin zoologjik dhe theksoi se vizitorët ishin evakuuar menjëherë pas arratisjes.

Parku, që përfshin më shumë se 60 hektarë, mban më shumë se 600 kafshë duke përfshirë luanë, majmunë dhe flamingo.

Nuk është hera e parë që urdhërohet mbyllja.

Tetorin e kaluar Barbara Pompili, Ministrja e Tranzicionit Ekologjik të Francës, detyroi kopshtin zoologjik të mbyllej, duke përmendur shqetësimet për mirëqenien e kafshëve dhe sigurinë e stafit.

Megjithatë, një gjykatë e rrëzoi këtë vendim disa ditë më vonë, duke lejuar kopshtin zoologjik të mbajë kafshët e tij.