Kryeprokurori i Arabisë Saudite, Saud al-Mojeb, është duke e diskutuar vrasjen e gazetarit, Jamal Khashoggi, me kryeprokurorin e Stambollit, ka raportuar agjencia shtetërore e Turqisë, Anadolu.
Turqia është duke kërkuar ekstradimin e 18 sauditëve të dyshuar që janë ndaluar në Arabinë Saudite për vrasjen e Khashoggit në konsullatën saudite në Stamboll, pasi ai kishte hyrë në këtë ndërtesë më 2 tetor.
Ministri i Jashtëm saudit, Adel al-Jubeir, ka thënë se kryesit e vrasjes do të gjykohen në Mbretëri.
Ndërkohë, Anadolu ka thënë se al-Mojeb ka arritur në gjykatën kryesore të Stambollit më 29 tetor për të takuar kryeprokurorin e qytetit, Irfan Fidan.
Sipas kësaj agjencie, edhe prokurori saudit do të bëjë kërkime në konsullatë.
Vrasja e Khashoggit, kolumnistit të Washington Postit dhe kritikut të trashëgimtarit të fronit saudit, Muhammad bin Salman, ka nxitur zemërim ndërkombëtar.
Al-Mojeb ka thënë javën e kaluar se vrasja ka qenë e paramenduar, duke bërë kështu deklarata kundërthënëse, në krahasim me deklarata tjera zyrtare lidhur me këtë rast.
Turqia në anën tjetër ka thënë se ka ndarë informacione lidhur me vrasjen e Khashoggit me disa shtete duke përfshirë, Shtetet e Bashkuara, Gjermaninë, Francën dhe Rusinë. /rel/
