Zgjedhja e Hashim Thaçit si President i ri i Kosovës është përcjellë edhe nga mediat e mëdha botërore.

Gjiganti britanik, BBC, shkruan se “Thaçi u zgjodh President në tymin e gazit lotsjellës”.

BBC ka shkruar edhe për përjashtimin e deputetëve të Opozitës pasi fillimisht hodhën gazin ngacmues.

“Jap garanci se do ta ndërtojmë një Kosovë të re, një Kosovë europiane dhe do t’i thellojmë raportet me Shtetet e Bashkuara të Amerikës”, citon BBC Thaçin.

Reuters shkruan se “Parlamentarët e Kosovës kanë zgjedhur Presidentin e ri, ndërsa kjo është kundërshtuar me protesta, gaz lotsjellës dhe koktej molotovi”.

Televizioni rus, Russia Today, shkruan se “opozita anti-serbe dështoi në tentativën e saj për të penguar zgjedhjen e Presidentit, ku parlamentarët zgjodhën liderin e katërt të provincës”.

Për zgjedhjen e Thaçit kanë shkruar edhe mediat italiane, ku agjencia e lajmeve Ansa shkruan se, “Kosove, Hashim Thaçi zgjidhet president”.

Ndërsa agjencia turke e lajmeve Anadolu Ajansi shkruan: “Thaçi eshte presidenti i ri i Kosovës”.

ABC News amerikane shkruan se ish-lideri i gueriles shqiptare (Ushtrisë Çlirimtare të Kosovës), pritet të zgjedhet Presidenti i ri i Kosovës.

“Thaçi, i cili udhëheqi luftën e suksesshme të Kosovës drejt ndarjes me Serbinë në vitet 1998-99, besohet se i ka votat e nevojshme në Parlamentin e vendit”, shkruan ABC News.