Mbi 40 gradë celsius pritet të shënojë termometri në mesjavë në kryeqytet dhe disa qytete të tjera. Sinoptikanët thonë se temperaturat ekstreme që do të përfshijnë vendin janë si pasojë e masave ajrore të ardhura nga Afrika.

“E mërkura, e enjtja dhe e premtja do jenë ditët më të nxehta ku dhe zonat veriore si Peshkopia do të regjistrojnë 38 gradë, ndërsa kryeqyteti dhe Elbasani do shkojnë mbi 40 gradë. Prezenca e lagështirës në ajër do të bëj që këto temperatura të ndihen të paktën 5 apo 6 gradë më shumë”.

Temperaturat e larta do të na shoqërojnë dhe gjatë natës veçanërisht në bregdet ku termometri nuk do të zbres nën 24 gradë në minimumin e tij.

Fundjava do të sjell një ulje të temperaturave me 3 gradë, por gjithsesi ekspertët e motit vlerësojnë se këto temperatura janë anormale pasi  vlerat normale për Qershorin nuk i kalojnë 30 gradë në maksimumin e tyre.