Nga: Isuf Kadriu

Gjykata e Apelit në Shkup ka konfirmuar vendimin e Gjykatës Themelore për grupin e njohur si i Kumanovës, i cili më 2 nëntor 2017 ishte  dënuar me 746 vjet burgim. Për veprën terrorizëm ishin dënuar gjithsej  37 persona, shumica shtetas të Kosovës, të cilën ishin shpallur fajtorë  për ngjarjet e 9 dhe 10 majit të vitit 2015 në ‘Lagjen e Trimave’, në  Kumanovë.

Gjatë luftimeve që kishin zgjatur dy ditë ishin vrarë 8 pjesëtarë të  forcave policore dhe 10 pjesëtarë të grupit të armatosur. Shtatë  pjesëtarë të grupit ishin dënuar me burg të përjetshëm, 13 janë dënuar  me nga 40 vjet burg, derisa 6 prej 37 të akuzuarve janë dënuar me nga 20  vjet burg. Të akuzuarit e tjerët janë dënuar me nga 18 vjet e më  poshtë.

Pjesëtarët e grupit, gjatë procesit të gjatë gjyqësor kanë hedhur  poshtë akuzat për terrorizëm, duke theksuar se në ‘Lagjen e Trimave’ në  Kumanovë, kishin shkuar për t’i tërhequr vërejtjen autoriteteve  maqedonase, për siç kanë thënë, “mosrealizimin e drejtave të  shqiptarëve” sipas asaj që ishte paraparë në Marrëveshjen e Ohrit.

Pjesëtarët e grupit dhe pala mbrojtëse ka kërkuar hetim ndërkombëtar,  ndërsa ka përsëritur qëndrimet se rasti ka qenë i orkestruar nga  qeveria e kaluar për të shpërqendruar vëmendjen nga skandalet, me të  cilat përballej ajo, në veçanti me aferën e përgjimeve dhe raste tjera.

Nga Qeveria e Maqedonisë së Veriut kanë thënë se mbeten në qëndrimin  mbi nevojën e zbardhjes së këtij rasti dhe se pasi të ketë një epilog  gjyqësor, do të mund të inkuadrohen ekspertët ndërkombëtarë.

Kryeministri në largim i Kosovës, Ramush Haradinaj në një prononcim për media kishte kërkuar që grupi të ekstradohet në Kosovë për vuajtjen e dënimit më burg. Pas vërtetimit të dënimit, pala  mbrojtëse ka të drejtën e ankimimit të vendimit të Apelit në Gjykatën  Supreme. /REL/