“Presidenti akuzohet se përdori pavarësinë për politike”

Tanke në zemër të Uashingtonit dhe avionë lufte të ngritur në qiell teksa Presidenti mbante fjalimin përpara memorialit të Abraham Lincoln.

Ishte kjo panorama e 4 Korrikut, festës së pavarësisë që Donald Trump zgjodhi ta përkujtonte në një mënyrë të veçantë, por të mbuluar nga kritikat e politikës dhe opinionit publik në Shtetet e Bashkuara.

Dhjetëra mijëra amerikanë të mbledhur në Uashington pasditen e së enjtes shijuan spektaklin ushtarak të premtuar nga Trump, një traditë që në SHBA mungonte prej dekadash.

Të shumtë ishin politikanët demokratë që kritikuan Presidentin se po e përdor festën e pavarësisë për egon e tij personale dhe për qëllime elektorale. Paradën ushtarake Trump e premtoi qysh në 2017, kur ishte i ftuar në Paris me rastin e festës kombëtare të Francës me 14 Korrik, shoqëruar me paradën tradicionale ushtarake që frymëzoi Shefin e Shtëpisë së Bardhë.