Serbia mund të ofrojë informacione të reja tek Prokuroria Speciale në Hagë kundër Ramush Haradinajt.

Kështu të paktën po pretendon kryetari të ashtuquajturit Komisionit Parlamentar për Kosovën në Qeverinë e Serbisë, Milovan Drecun, transmeton lajmi.net.

I njëjti i ka thënë gazetës “Politika” se autoritetet serbe kanë gjetur mënyrë për të komunikuar me Prokurorinë në Hagë, ani pse sipas tyre e njëjta është pjesë e sistemit juridik të Kosovës, të cilën Serbia nuk e njeh.

“Komunikimi është realizuar me ta sepse është në interesin tonë të vijmë deri tek drejtësia, dhe t’i gjykojmë krimet e mundshme. Komunikimi është realizuar megjithë faktin që kjo gjykatë është formuar në Prishtinë”, ka thënë ai.

Madje ka thënë se Serbia ka formuar taskë forcë e cila do të punojë në këtë drejtim.

“Ka dëshirë dhe fakte që nuk mund të diskutohen tani”, thotë ai.

Haradinaj është ftuar nga Specialja në cilësinë e të dyshuarit. Pas kësaj, ai dha dorëheqje nga posti i kryeministrit ndonëse në Hagë kishte për t’u paraqitur vetëm për intervistim.

Nuk dihet nëse ndaj tij Specialja do të ngrisë aktakuzë, për shkak se kjo varet nga rrjedha e hetimeve dhe provave të administruara nga Prokuroria./GE/