Milan dhe Roma kanë barazuar në derbin e xhiros së pestë në Serie A, një barazim që ka ardhur pas spektaklit të golave 3-3.

Milani e nisi për mrekulli ndeshjen ku vetëm pas dy minutave lojë shënuan golin e parë.

Rafael Leao asistoi bukur për Zlatan Ibrahimovic i cili shënoi me lehtësi për 1-0.

Megjithatë gëzimi i vendasve zgjati vetëm 12 minuta, pasi Edin Dzeko barazoi gjithçka me kokë për 1-1 në minutën e 14-të pas asistimit nga Lorenzo Pellegrnii.

Dy skuadrat krijuan raste të mira shënimi në pjesën e parë, por 45 minutat e para u mbyllën me rezultat të barabartë 1-1.

Rossonerët edhe në fillim të pjesës së dytë shënuan herët, kur Saelemaekers realizoi pas asistimit nga Leao për 2-1.

Në minutën e 70-të, Roma fitoi penallti të cilën në gol e shndërroi mesfushori francez Jordan Veretout për 2-2.

Por festivali i golave nuk u ndal dhe Milani në minutën e 78-të fitoi penallti kur Gianluca Mancini pengoi në zonë turkun Hakan Calhanoglu.

I saktë nga pika e bardhë u tregua Ibrahimovic për ta kaluar Milanin në epërsi 3-2.

Kryeqytetasit nuk u dorëzuan dhe pesë minuta më vonë barazuan shifrat në 3-3.

Ishte mbrojtësi shqiptar, Marash Kumbulla që shënoi me këmbë nga afërsia për rezultatin e barabartë 3-3.

Deri në fund dy skuadrat tentuan ta fitonin ndeshjen, por rezultati mbeti ai i minutës së 84-të, 3-3.

Për Milanin ky ishte barazimi i parë në kampionat dhe ka edhe katër fitore për ta mbajtur pozitën e parë në tabelë me 13 pikë.

Ndërkohë Roma mbetet në vendin e tetë në tabelë me tetë pikë të tubuara.