Pak ditë pas takimit mes kryeministrit Rama dhe homologut grek Micotakis, Athina zyrtare këmbëngul në shtrirjen e ujërave territorial në 12 milje ne detin Jon, madje duke nënvizuar se nuk nevojitet miratimi nga Shqipëria dhe kjo e fundit as nuk mund ta kufizojë këtë të drejtë.

NIKOS DHENDHIAS

MINISTER I JASHTEM I GREQISË

Shërbimet kompetente të Ministrisë së Punëve të Jashtme po përpunojnë lëvizjet e nevojshme për shtrirjen e ujërave territoriale të Greqisë në 12 milje. në Jon fillimisht, ndërsa do të ketë përgatitje për zona të tjera në vijim. Është një ushtrim i së drejtës ekskluzive i njohur nga Ligji Ndërkombëtar i Detit dhe që nuk i nënshtrohet asnjë lloj kufizimi ose miratimi të palëve të treta.

Por Dhendhias vë në dukje se megjithëse është një e drejtë sovrane e Greqisë, janë të domosdoshme konsultimet me Tiranën zyrtare, kur ato kërkohen.

Qëllimi ynë është që gradualisht të caktojmë, gjithmonë brenda kornizës së Ligjit Ndërkombëtar, të gjitha zonat tona detare, në konsultim të plotë, kur kërkohet, me fqinjët tanë. Pas dy marrëveshjeve me Italinë dhe Egjiptin, situata është e përshtatshme që Greqia të ndërmarrë hapa të mëtejshëm.

Kryediplomati grek nuk e fsheh se qëllimi përfundimtar i qeverisë Micotaqis është shtrirja e ujërave territorial në Egje në kulmin e tensioneve me Turqinë, duke kërkuar në parim një zgjidhje paqësore.

Fatkeqësisht, ne shohim një përpjekje të vazhdueshme nga Turqia për të ngritur çështje në mënyrë të njëanshme, duke minuar këto kontakte para se ato të rifillojnë madje. Një vëzhgues skeptik do të thoshte se Turqia duket se po përqendrohet në një lojë fajësimi, në vend se të përqendrohet në gjetjen e zgjidhjeve paqësore.

Më herët kryeministri Rama ka siguruar se zgjerimi grek me 12 milje në ujërat e Jonit nuk e cënon territorin shqiptar.