“The Times”: Në projekt i përfshirë edhe Frontex
Teksa Gjykata Kushtetuese pezulloi për momentin ratifikimin nga ana e parlamentit, deri në një vendim përfundimtar të marrëveshjes së nënshkruar me Italinë në 6 Nëntor nga dy kryeministrat Rama e Meloni, mediat britanike kanë publikuar planimetrinë e qendrës së pritjes në Shëngjin ku do të strehohen fillimisht emigrantët.
“The Times” shkruan se në këtë qendër do të jenë 4 godina akomodimi, të rrethuara nga një perimetër sigurie.
Gjithashtu do të ketë dhoma intervistimi për oficerët italianë të emigracionit, ku një zonë do jetë e dedikuar për agjencinë europiane të emigracionit Frontex, ç’ka sipas të përditshmes britanike “The Times”, provon se i përfshirë në këtë projekt është edhe Bashkimi Europian.
Protokolli dypalësh përcakton në nenin 3 dhe 4 të tij se shteti fqinj merr në përdorim sipërfaqe të territorit shqiptar për ngritjen e strukturave pritëse në Shëngjin dhe ato akomoduese në Gjadër, që do të mbulohen tërësisht me shpenzimet e palës italiane.
Sipas marrëveshjes, Italia do të përballojë çdo shpenzim për të strehuarit duke përfshirë kostot e kujdesit shëndetësor, si dhe largimin e migrantëve nga Shqipëria.
Kufiri maksimal i pritjes së të huajve do të jetë jo më shumë se 3 mijë persona të strehuar në të njëjtën kohë dhe se afati maksimal i qëndrimit të një emigranti nuk mund të jetë më i madh se koha e nevojshme për procedurat e azilit dhe mbrojtjes.
Por teksa Kushtetutesja pritet ta thotë fjalën e fundit në 18 Janar të vitit të ardhshëm, pas atakimit që 30 deputetë të opozitës i bënë kësaj marrëveshjeje në gjykatë, Kryeministri Rama është shprehur se për marrëveshjen kanë punuar ekspertët më të mirë të të dyja qeverive dhe se ajo i ka kaluar të gjithë filtrat dhe është në përputhje me Kushtetutën e Shqipërisë.
Marrëveshja ka marrë mbështetjen edhe të Presidentes së Komisionit Europian Ursula Von Der Leyen, e cila disa ditë më parë bëri të ditur se “ky rast shërben si një shembull i të menduarit jashtë normave tradicionale, mbështetur në ndarjen e drejtë të përgjegjësive me vendet e treta në përputhje me detyrimet e BE-së dhe të ligjit ndërkombëtar”.
