Anulimi i europianit të futbollit këtë verë nuk është mes opsioneve të UEFA-s as në skenarin më të errët. Qeveria kontinentale e futbollit nuk ka ndërmend të fshijë nga kalendari Kampionatin për shkak të dëmit financiar që do të shkaktonte por gjithashtu për cenimin e rëndë që do ti bëhej librave të historisë, edhe pse në kushte pandemie. Euro 2020 u shty fillimisht në Mars të vitit të kaluar për shkak të shpërthimit të koronavirusi. Por, me pandeminë që shkakton sërish një frikë të madhe në të gjithë kontinentin dhe me vende të shumta në bllokim, ekziston shqetësimi se eventi mund të anulohet, por kjo thjesht nuk është një opsion, sipas UEFA-s. Qeveria e presidentit Ceferin po shikon një numër opsionesh alternative nëse turneu elitar nuk do mund të zhvillohet në formatin origjinal.

Detajet e raportit tregojnë se anulimi i europianit do të ishte ‘shkatërrues për shumë nga 55 Federatat dhe iniciativat e UEFA-s dhe programet e zhvillimit, të gjitha këto që mbështeten në të ardhurat e turneve të mëdha për të operuar. UEFA do të marrë një vendim përfundimtar në mes të Marsit, me vetëdijen që turmat masive në stadiume, nuk do jenë të mundshme. Opsioni më i mirë është që stadiumet të mbajnë 70 përqind të kapacitetit, me një alternativë prej 30 % një skenar të dytë. Impianti londinez Wembley është vendosur të zhvillojë si gjysmëfinalet ashtu edhe finalen në korrik.

UEFA ka një problem serioz pasi 90% e biletave janë shitur tashmë dhe ka një ‘numër minimal’ të kthyer pas shtyrjes së turneut. Franca, Gjermania, Anglia dhe Skocia janë vende ku mund të spostohet totalisht europiani nëse kriza vazhdon. Rusia është gjithashtu alternativë. Sidoqoftë, nëse turneu që do të mbahet në 12 qytete, nuk mund të luhet në të gjithë Evropën, ka mundësi për t’u rikthyer në të tillë skenarë pa tifozë si finalizimi i Champions në Lisbonë.