Qeveria e Kosovës nuk ka pritshmëri të mëdha se javën e ardhshme do të largohen masat ndëshkuese nga Bashkimi Evropian, për shkak siç thonë qasjes joparimore të shefit të politikës së jashtme të BE-së, Josep Borrell. Në ekzekutiv deklarojnë se kryediplomati evropian ka pasur qasje të padrejtë ndaj Kosovës, madje e kualifikojnë si të paefektshme edhe mundësinë që në raportin e Borell të përfshihen edhe zhvillimet e fundit në veri sa i përket dinarit dhe shpronësimeve.

Sipas tyre, Kosova s’ka arsye që të shqetësohet edhe nëse nuk hiqen masat, por duhet të pres strukturat e reja në BE për t’i parë cilat do të jenë zhvillimet. Mundësinë e vazhdimit të masave ndëshkuese të BE-së ndaj Kosovës e shohin edhe njohësit e integrimeve evropiane.

Ministrja e Punëve të Jashtme dhe Diasporës, Donika Gërvalla, tha për KosovaPress, se Kosova ka përmbushur të gjitha kërkesat e BE-së për deeskalim në veri, andaj para se të zëvendësohen institucionet nga zgjedhjet në BE duhet të hiqen masat ndëshkuese ndaj vendit.

“Shpresoj se më në fund e bëjnë hapin e duhur para se të zëvendësohen këto institucione nga të tjerat që dalin nga vota që presim së shpejti. Mirëpo, me ato që kemi parë deri tani, si ka qenë trajtimi i padrejtë i Kosovës në raport me shkeljet e Serbisë në procese, nuk është se kam pritje të mëdha…Jo parimor ka qenë qëndrimi i Borell në përgjithësi ndaj temave mes Kosovës dhe Serbisë dhe nuk është se kam pritje të larta në hapat e fundit që mund dhe duhet të ndërmerren. Ato masa kanë qenë objekt i një negocimi të zëvendëskryeministrit, Bislmi me Lajçakun në Bratislav, jo vetëm që janë përmbushur ato pesë pika për të cilat janë kuptuar, por janë mbi përmbushur shumëfish, prandaj nuk e di çfarë të them. Është e paparashikueshme për mua. Sa i përket meje, ata mund të fusin edhe gjitha temat tjera që nuk kanë asnjë lidhje me Serbinë, në kuadër të këtyre masave, po nuk është se ka përcjellë ndonjë efekt…Mirëpo, do të na mbetet të shohim zhvillimet e ardhshme. Mendoj, se si Kosovë nuk kemi arsyeje të ngutemi, as të jemi të shqetësuar, do t’i presim strukturat e ardhshme, do t’i shohim cilët persona do të jenë përgjegjës dhe të shohim më tej cili do të jetë zhvillimi. Kemi kohë të mirë për të vazhduar me hapat të rëndësishëm brenda vendit tonë, me implementimin e masave të rëndësishme që i qojnë më tej reformat brenda Kosovës dhe këto reforma të cilat i kemi premtuar dhe zbatuar do të japin rezultatet e tyre”, thotë Gervalla.

Skeptik për largimin e masave ndëshkuese ndaj Kosovës është edhe njohësi i integrimeve evropiane, Dritëro Arifi.

Sipas tij, BE-ja mund të vazhdojë status-qou e masave për shkak të hapave të fundit të qeverisë në lidhje me ndalimin e dinarit dhe shpronësimet në veri.

“Masat të largohen se janë të padrejta. Por kam frikë se mund të vazhdohet një status-qou pikërisht për hapat që i ka marrë qeveria së fundmi. Me shpronësimin e tokave dhe çështjen e dinarit. Është një jokonsistencë e qeverisë në raport me BE-në dhe kam frikë që mund të kemi inati që mund të mbesin dhe të përfshihen në raport. Por shpresojmë që BE-ja do të përmirësojë atë që ka bërë gabim gjatë muajve të kaluar dhe të propozojë që hiqen masat”, deklaron Arifi.

KosovaPress ka pyetur edhe në Bashkimin Evropian se a do të hiqen masat ndaj Kosovës, pas dorëzimit të raportit të shefit të politikës së jashtme të BE-së, Josep Borrell, i cili u paralajmërua se javën e ardhshme do t’i dorëzohet vendeve anëtarë. Mirëpo, të njëjtit nuk kanë kthyer përgjigje.

Masat ndaj Kosovës ishin vendosur para një viti si përgjigje ndaj përshkallëzimit të situatës së sigurisë në veri të Kosovës kur Kosova dërgoi në ndërtesat e komunave kryetarët shqiptarë të dalë nga zgjedhjet që u bojkotuan nga serbët.