Politikat e gabuara të qeverisë së Nikolla Gruevskit kanë ndikuar që në 10 vitet e fundit në mënyrë drastike të rritet shpërngulja e qytetarëve nga Maqedonia.

Sipas të dhënave të publikuara nga opozita maqedonase, brenda dekadës së fundit nga vendi janë larguar rreth 150 mijë qytetarë. Varfëria, papunësia e lartë, standardi i ulët, pasiguria dhe problemet e vazhdueshme ndëretnike janë disa nga arsyet që e bëjnë Maqedoninë si vend pa perspektivë, vlerësojnë deputetë e opozitës.

“Për fat të keq, për shkak të politikave që udhëheq në 10 vitet e fundit pushteti, kemi një situatë dramatike që ka detyruar qytetarët që ardhmërinë e tyre ta kërkojnë jashtë vendit tonë. Në këto vite, sjellja e qeverisë me qytetarët është e tmerrshme. Kjo që ndodh tek ne në Maqedoni nuk është shpërngulje, por është eksod”, deklaroi Sonja Mirakovska, deputete e PRSD-së.

Shqetësimin për shpërnguljen e qytetarëve opozita maqedonase e ka ngritur në Kuvend, ku deputetët e saj kanë shpalosur të dhëna alarmante për këtë problem.

Nga ana tjetër, mazhoranca është përgjigjur me kundërakuza. Sipas deputetëve të VMRO-DPMNE-së, fluksi më i madh i largimit të qytetarëve është shënuar në vitin 1994, kur vendi keqqeverisej nga LSDM-ja që tani ndodhet në opozitë.

“Shprëngulja më e madhe e qytetarëve nga ky vend ka ndodhur në vitin 1994, kur numri i përgjithshëm i banorëve është ulur me 124.000 mijë persona. Kjo ka ndodhur për shkak se në atë kohë në Maqedoni, privatizimi i pronës shtetërore u bë në mënyrë mafioze”, deklaroi Krste Mukovski, deputet i VMRO-DPMNE-së.

Duke folur për shpërnguljen e banorëve të Maqedonisë që nga koha e ish-sistemit komunist, deputetët e opozitës kanë bërë të ditur se deri tani rreth 22% e popullsisë është larguar nga vendi. Numri më i madh i qytetarë janë shpërngulur në vendet e Bashkimit Evropian.