Lezha është një prej qarqeve më të prekura nga përmbytjet në vend për shkak të reshjeve intensive të shiut.

Korrenspondentja e Klan News në Lezhë, Vera Deda, raporton se në njësitë administrative të Lezhës janë 1200 hektarë tokë nën ujë dhe 23 banesa të përmbytura.

Konkretisht, në njësitë administrative Dajç dhe Blinisht janë të përmbytura 700 hektarë, ndërsa në Balldre 500 hektarë.

Gjithashtu, në Dajç dhe Gjadër janë 15 banesa nën ujë dhe 5 banesa të tjera në fshatin Zojs. Ura e këtij fshati është e pakalueshme. Edhe në fshatin Kakarriq janë 3 banesa të përmbytura.

Në Bashkitë Mirditë dhe Kurbin nuk raportohet për probleme.

Në Shkodër kanë vijuar operacionet e evakuimit në lagjet Kuq, Ajaem dhe Berdicë. Ndërkohë është ndërprerë qarkullimi në aksin Shkodër – Tiranë tek Harku i Berdicës për shkak të prezencës së ujit rreth 50 cm dhe për shkak të dëmtimit të urës së vjetër të Bahçallëkut ku mbeturinat e saj janë përplasur në urën ekzistuese. Sipërfaqet e përmbytura në fushën e Obotit dhe në fushën e Dajçit janë rreth 70 hektarë tokë.

Në fshatrat Mali i Jushit, Hoten, Rranza, Bushat janë 10 familje që kanë prezencë uji në banesa në lartësi 30 cm si dhe 1711 hektarë tokë bujqësore nën ujë.

Në njësinë administrative Hajmel ka dalje të përronjve nga shtrati në fshatin Hajmel dhe Paçram që për pasojë ka vërshime të ujërave në rrugët kryesore të fshatrave dhe sipërfaqe toke bujqësore nën ujë.

Në Qarkun Gjirokastër nuk ka sipërfaqe toke të përmbytura. Ka patur probleme të vogla me akset rrugore, të cilat janë pastruar nga inertet në autoritetet lokale.

Edhe në Qarkun e Dibrës situata është e qetë.Gjatë natës ka pasur rënie gurësh në aksin Milot-Burrel në afërsi të tunelit të Shkopetit, ku është bllokuar rruga. Ndërhyrja e kompanisë mirmbajtëse ka qenë me vonesë, dhe rruga është bërë e kalueshme në një sens vetëm pas mesnatës. Deri tani nuk raportohen problematika.