Sot në Kosovë do të arrijë një delegacion i lartë shtetëror nga Shtëpia e Bardhë.

Ky delegacion i udhëhequr nga John Erath, kryshefi për çështjet evropiane në Këshillin Kombëtar të Sigurisë Amerikane, pritet të takohet me krerët institucionalë. Bashkë me Erath ka udhëtuar edhe drejtori për çështje të Evropës në Këshillin Kombëtar, William Berkley.

Përveç këtyre në Serbi e Kosovë do të zhvillojnë një vizitë edhe një delegacion i lartë i Bashkimit Evropian, i udhëhequr nga kryesuesi i Komitetit për Punë të Jashtme dhe raportuesi për Serbinë, David McAllister.

Vizita e tyre do të fillojë sot në Serbi dhe do të përfundoj me 2 mars në Kosovë.

Bashkë me këtë delegacion do të jetë edhe raportuesi për Kosovën në Parlamentin Evropian ,Igor Soltes, shkruan Gazeta Express.

Vazhdimi i dialogut me Serbinë do të jetë çështja kryesore për të cilën do të angazhohet ky delegacion i Parlamentit Evropian.

Në komunikatën e dërguar për media, thuhet se ky delegacion nuk e përkrah idenë për vendosjen e kufijve ndërmjet Kosovës dhe Serbisë në vija etnike, dhe sipas tyre një ide e tillë nuk duhet të jetë synim i Kosovës dhe Serbisë.

McAllister në fjalën e tij para takimit ka thënë se ky do të jetë delegacioni i fundit që Bashkimi Evropian do të dërgojë në Kosovë brenda kësja legjislature.

Ai ka thënë se duhet të shfrytëzohet ky momentum për arritjen e marrëveshjes duke paralajmëruar takime me krerët e shtetit të cilat sipas tij do të jenë vendimtare.

Komunikata e plotë:

PE do të dërgojë një delegacion të eurodeputetëve në Beograd dhe Prishtinë nga data 27 shkurt deri më 2 mars për të vlerësuar situatën politike dhe për të vlerësuar marrëdhëniet e BE-së me Serbinë dhe Kosovën.

Një delegacion prej shtatë eurodeputetëve, i udhëhequr nga Kryesuesi i Komitetit të Punëve të Jashtme dhe raportuesi për Serbinë, z. David McAllister (PPE, DE), do të takohet me lidershipin politik në Beograd dhe Prishtinë, si dhe me deputetë, përfaqësues të opozitës dhe shoqërisë civile.

Qëllimi i vizitës është vlerësimi i situatës politike në terren dhe vlerësimi i marrëdhënieve të tanishme të Serbisë dhe Kosovës me BE-në, duke përfshirë reformat e dakorduara në mënyrë reciproke dhe dialogun e ndërmjetësuar nga BE-ja midis Beogradit dhe Prishtinës.

Më 29 nëntor të vitit të kaluar, Parlamenti Evropian ka miratuar dy rezoluta për Serbinë dhe Kosovën. Në këto rezoluta, eurodeputetët kanë mirëpritur angazhimin e vazhdueshëm të Serbisë në rrugën e integrimit në BE, megjithëse gjithashtu i kanë kërkuar autoriteteve të rritin përpjekjet për reforma në sundimin e ligjit, të intensifikojnë luftën kundër korrupsionit dhe krimit të organizuar dhe të vazhdojnë me reformat e administratës publike të vendit.

Sa i përket Kosovës, eurodeputetët kanë mirëpritur miratimin e legjislacionit të kohëve të fundit, por kanë shprehur shqetësim për mungesën e konsensusit ndërpartiak dhe polarizimin e vazhdueshëm politik, që vazhdon të ndikojë negativisht në rrugën e reformës së qëndrueshme. Ata gjithashtu kërkuan përpjekje më të mëdha në luftën kundër korrupsionit të përhapur, për të trajtuar elementet e kapjes së shtetit dhe ndikimin e panevojshëm politik dhe problemet e vazhdueshme me një proces të rregullt. Në të dy rezolutat, eurodeputetët kanë mbështetur dialogun e lehtësuar nga BE- ja si kornizë për të arritur një marrëveshje gjithëpërfshirëse të normalizimit midis Serbisë dhe Kosovës.

Duke marrë parasysh debatin e kohëve të fundit mbi shkëmbimet e mundshme të territoreve ndërmjet Serbisë dhe Kosovës, eurodeputetët theksuan se shtetet etnikisht homogjene nuk duhet të jenë objektiv në rajon dhe se çdo marrëveshje e ardhshme do të ishte e pranueshme vetëm nëse arrihet pajtimi i ndërsjellë midis Serbisë dhe Kosovës dhe nëse merr parasysh stabilitetin e përgjithshëm në rajon dhe ligjin ndërkombëtar. Kjo vizitë pritet të trajtojë disa nga temat e theksuara në rezolutat e PE të miratuara në nëntor të vitit 2018, si dhe zhvillimet më të fundit në rajon.

Përpara vizitës, Z. McAllister tha: “Javën e ardhshme, Komiteti i Punëve të Jashtme i Parlamentit Evropian po dërgon dy delegacione në Ballkanin Perëndimor – këto me gjasë do të jenë dy misionet e fundit të këtij komiteti në këtë legjislaturë. Ballkani Perëndimor është prioritet për politikën e jashtme të BE-së. Duhet të mbështesim Serbinë dhe Kosovën në ndërtimin e institucioneve të forta demokratike që mbështesin sundimin e ligjit dhe mundësojnë lulëzimin e shoqërisë civile. Mbi të gjitha, duhet të arrijmë marrëdhënie të mira fqinjësore midis të gjitha vendeve të rajonit, duke shfrytëzuar momentumin e suksesit në Maqedoninë e Veriut. Ne i kushtojmë rëndësi të madhe zhvillimeve në Serbi dhe Kosovë dhe aspiratave të qytetarëve të tyre, prandaj po vijmë të takohemi si me udhëheqësit politikë ashtu edhe me shoqërinë civile në këtë periudhë vendimtare”.

Përveç z. McAllister, delegacioni i PE-së do t përbëhet edhe nga gjashtë eurodeputetë:

Z. Elmar Brok (EPP, DE), Zj. Neena Gill (S&D, UK), Z. Arne Lietz (S&D, DE), Z. Ryszard Czarnecki (ECR,PL), Raportuesi i PE për Kosovën Z. Igor Šoltes (Të Gjelbërit/EFA/SL) dhe Z Jaromir Kohlicek (GUE/CZ).