Kryeministri i Kosovës, Ramush Haradinaj, e ka vlerësuar si të ngutshme dhe të gabuar qasjen e Listës Serbe për formimin e njëanshëm të Asociacionit të komunave me shumicë serbe.
“Nuk ekziston formula për ta krijuar vetë, ekziston një jurisdiksion në Kosovë”, ka thënë Haradinaj në “Rubikon” të KTV’së.
“Është një Kushtetutë, një bazë ligjore, është vetëm një legjislativ – Parlamenti i vendit”, ka theksuar ai.
“S’ka si të krijohet vetë. S’ka bazë tjetër”, ka deklaruar shefi i ekzekutivit.
“Fatkeqësisht, kjo është një qasje e gabuar. Është një ushtrim që mund ta bëjnë ata, inekzistent”, ka thënë Haradinaj.
Kryeministri kosvar ka paralajmëruar se do të merren masa ndaj të gjithë atyre që nuk e respektojnë ligjin dhe Kushtetutën e Kosovës.
Shefi i Qeverisë po ashtu ka bërë të ditur se ishte i njoftuar një natë më parë për largimin e Listës Serbe nga koalicioni qeverisës i vendit, në qoftë se ndalohet dhe arrestohet zyrtari serb, Marko Gjuriq.
