Pavarësisht situatës me komisionet parlamentare socialistët nuk kanë humbur kohë dhe nisin përgatitjet për një ndryshim të ri kushtetues që lidhet me procesin e vettingut në drejtësi.

Nga mbledhja e kryesisë së grupit parlamentar socialist Taulant Balla u kërkoi kryetarëve të komisioneve të bashkërendojnë punën për një ndryshim kushtetues.

Bëhet fjalë për ndryshimin e nenit ku parashikohet kohë-veprimi Komisionit të Pavarur të Kualifikimit që mbaron më 7 Qershor 2022.

Nga foltorja e parlamentit ishte Ulsi Manja ministër i drejtësisë që kërkoi votat e opozitës për këtë ndryshim për ti dhënë KPK afat veprimi deri në përfundimin e vettingut të 370 gjyqtarëve dhe prokurorëve në listë për tu vetuar.
Burime nga PD i thanë Top Channel se kjo nuk është çështje në shqyrtim dhe se PD do të ketë qëndrimin e saj në kohën e duhur.

Ndërsa zyra e shtypit në LSI tha se kjo forcë politike do ta shprehë qëndrimin në kohën kur ndryshimet të diskutohen në parlament.

Krye-demokrati Lulëzim Basha në parlament deklaroi se “Reforma në drejtësi është një e sëmurë që mbahet në intubim prej ndërkombëtarëve.

Vetë demokratët deri më tani kanë artikuluar kërkesën për ndryshime kushtetuese që garantojnë ndarjen dhe balancimin e pushteteve përfshi shkëputjen përfundimtare të politikës nga krimin.